Ook vanavond weer trekt vastelaovesminnend Méél naar onze weer prachtig verlichte ‘Kathedraal van de Pieël’ voor het bijwonen van de Vastelaovesmis. De eregasten zijn natuurlijk de prinsen, de prinsessen, vorsten en vorstinnen van Kieveloeët, Vèngneuze en Kéjsjeute te midden van hun Raden van Elf. De vastelaovesmis vormt al decennialang het startsignaal van de Méélse Vastelaovend. En het is inmiddels ook traditie, dat op deze zaterdag de vaste columnisten van de ‘zijbeuk’-keplaon Roger en Mat- dan plaats maken voor onze nieuwe prins; dit jaar voor prins Pascal I. Natuurlijk doet hij dit niet vanuit de zijbeuk, waar keplaon en Mat het mee moeten doen, maar in het volle licht van de schijnwerpers: vanaf de kansel. Uw gewaardeerde aandacht voor Zijne Doorluchtige Hoogheid Pascal den Uurste!
Beste Kieveloeëters
Lieve Kieveloeëterinnekens
Wa is ut tòch sjòn um prins van de Kieveloeët te maage zin. Ik daacht veuraf dè ik nao zòn aacht jòrre – uurst as lit van de rò van éllef èn dòrnao lit van ’t kómmietee – de Méélse Vastelaovend van binne èn van butje kéénde. Nee dus, want ’t Prins zin hi mijn stòwtste verwachtinge övvertròffe. Ge vuu:lt òw as Prins nie allieën gedraage dur de Kieveloeët, mèr dur de hél Méélse geménjsjap. Èn dè gevuu:l, èrvaar nie allieën ik, mèr ók Marjan èn ónze zoone Luuk èn Merlijn. Hél sjòn dè ók ónze pap mi zin 93 jaor di nòg mach meemaake.
Óns dèùrep hi ‘n riekke èn laang vastelaoves traddiessie èn ók vur de toekómst stòn alle leechte óp gruu:n. We hèbbe hier immers nie allieën De Kieveloeët, die al mieër as 66 jaor de vastelaoveskaar trékt, mèr d’r sté ók alwér ’n jóngere geeneraasie klaor um ‘t stukske van óns övver te neeme. De jeugt van de Véngneuze èn de Kéjsjeut hèbbe ur éjge plèkske veroovert in ’t Méélse Karnevalsgebeure. Zèllefs in de vastelaovesmis blaoze ze tiggewórrich ur éjge partééj mee. Nattuurlek zit die ènstèùremende jeugt ur éjge aksènte. Dè mach nie allieën, ik dink zèllefs dè ’t moet.. Mi oeëch èn rèspèkt vur die traddiessie zit élleke geeneraasie wér nééj éjgetitjse aksènte. Zò is dè in óns dèùrep aaltitj gegao. Èn zò zal dè hoopelek tòt in lèngte dèr jòrre blie:ve gebeure. Béj die ènpak dörref ik hier – mi ’ne varriejant óp minne prinsespreuk – stéllich te beweere dè ók in de toekòmst iederieën “Groeët òf kléénj van stuk, hier in óns dèùrep, ’t vastelaovesgeluk kan blie:ve belééve”.
Dè leeste slutj ók hél sjòn èn béj ’t teema van dees vastelaovesmis: ‘Huumòr èn Geluk’. Geluk is nie te koeëp, ók nie mi veul gèlt. As we in de jacht óp geluk allieën èn óns zèèlef dinke, zal dè utjloeëpe óp ’n groeëte teleurstélling. Geluk kanne we juust ’t stèrrekste èrvaare as we iemes anders tòt steun kanne zin.Gééve makt gelukkiger dan krie:ge. As we zien dè die ander wér iets bléjjer dur ’t lééve kan, zèùregt dè ók vur geluk béj óns zèèlef. As we zò dur ’t lééve gòn, kanne we d’r boovedien óp réékene dè as we zèèlef ‘s ’n steuntje in de rug nöddig hèbbe, die andere d’r ók vur óns zal zin.Èn gelukkich zien we die hòwding – d’r zin vur ’n ander – in ónze Méélse geménjsjap nòch aaltitj stèèrek trug.
Mi dè Vastelaovesgeluk is ’t nie anders. Dè begeent t’r al mi dè we niemes butje slutje. Iederieën die mee wil doe, moet de kans krie:ge, nèt zò goe as dè iederieën zin éjge keuzes moet kanne maake in ’t vastelaovesprógramma van de Kieveloeët, Véngneuze èn Kéjsjeut. Èn ók de kéérek duu ’n döjt in ’t zèkske, dur saame mi óns de Vastelaovesmis te òrganniezeere. Zòwal keplaon Roger as de Kieveloeët zalle ’t harstikke sjòn vinge as onze prachtich verlichte kattedraal vanaovent wér tòt de leeste plèk bezit is
Die mis vanaovent is vur óns ’t startséjn um dòrnao die wèèreme roeëj – géél-gruu:ne Méélse vastelaovesdeeke wér övver óns dèùrep utj te ròlle. Èn ónder die deeke is t’r ’n plèkske vur iederieën óp éllek mómènt dè héj òf zéj dòr zin in hi. Èn as we dan dinsdichaovent béj ’t Kievelmènneke die deeke wér ópròlle hoop ik dè we mi z’n alle trug kanne kie:ke óp dréj geweldig sjòn en gelukkige daage.
VASTELAOVEND SAAME
